НА ДЕНЕШЕН ДЕН 1943 ВО СЕЛОТО ПОДВИС, КИЧЕВСКО, ПОЧНА ДА РАБОТИ ПРВОТО УЧИЛИШТЕ НА МАКЕДОНСКИ ЈАЗИК

Чист апсурд. Кичевски, но и Македонски. Од училиштето во селото Подвис, Кичевско, каде што првпат се одвивала настава на македонски јазик, во септември 1943 година, на првата слободна територија во Македонија, денес е останата само урнатина, зарастена во трње и грмушки, а дотаму не може да се стигне со возило, иако оваа зграда е оддалечена само еден километар од магистралниот пат Кичево – Охрид.

Во годините кога во Македонија значително се инвестира во заживување на обележјата од националната историја, еден исклучително важен белег целосно е заборавен од државата.

– Додека училишната зграда беше во добра кондиција, на неа беше поставено спомен-обележје, што посочуваше дека тука првпат во земјава се одвивала настава на македонски јазик. Но под товарот на годините и човековата негрижа, училиштето почна да распаѓа и да се урива. 

Пред неколку децении од Дирекцијата за заштита на културните споменици побаравме да се изврши санација на училишната зграда. За жал, не постоеше интерес од таа страна, не се интервенира и објектот од ден на ден се претвора во урнатина. Откако жителите на Подвис увидоа дека државата нема интерес за негова ревитализација, ја дислоцираа спомен-плочата и ја донесоа во селото – вели Добре Лазарески, едно од седумте деца на првиот учител на македонски јазик во Македонија, Василко Ристески од селото Подвис.