НАД ПЕДЕСЕТТИНА ЧЛЕНОВИ НА „ГЕВГЕЛИЈА ТОЧАК КЛУБ“ И ГРАЃАНИ ГО ОДБЕЛЕЖАА СВЕТСКИОТ ДЕН НА ВЕЛОСИПЕДОТ СО ПАРАДНО ВОЗЕЊЕ НА РЕЛАЦИЈА ГЕВГЕЛИЈА – ПРДЕЈЦИ – ГЕВГЕЛИЈА

По повод одбележувањето на 3-ти јуни, Светскиот ден на велосипедот, денеска, недела, 4-ти јуни над педесеттина точкаџии, организирани од „Гевгелија точак клуб“ релаксирано ја извозија маршрутата од Гевгелија преку Негорци до Прдејци и назад. 

 

Со ова, изјави Венци Ристов, претседателот на овој клуб, испративме заедничка порака за важноста од користењето на велосипедот за сопственото здравје и за средината во која живееме за да поттикнеме и апелираме да се применува здрав начин на живеење уште од најмали години.

 

Велосипедот, истакна тој, е едноставен, достапен, економичен и еколошки одржлив начин за транспорт. Користењето на велосипедот овозможува да поминете повеќе време со своето семејство, нуди здравствени придобивки за целото семејство, го намалува стресот, добро е за срцето, ќе ги натера вашите деца да излезат надвор, ви помага да ја запознаете околината и е добар за планетата Земја.

 

Во Република Македонија секојдневно се повеќе луѓе го користат велосипедот како превозно средство, мотивирани од здравиот начин на живот, но и се поскапите горива, но, се чини, се уште сме далеку од тоа да станеме велосипедска нација и да го следиме примерот на некои од поразвиените земји, каде велосипедите се речиси секојдневие во начинот на живот и нивниот превоз.

 

Во Гевгелија, вели Ристов, речиси секое домаќинство има барем еден велосипед па на овој начин да се потрудиме барем на 4-ти јуни градот да ни заличи како повеќето градови во Данска или Холандија. Во светот и во Македонија има многу добри места за возење за велосипед, а општина Гевгелија е идеална со одличен рамнински дел но и прекрасни ридско, планински предели за адреналинските зависници.

 

Инаку, Генералното собрание на ООН во април 2018 година, го прогласи 3 јуни за Светски ден на велосипедот. Целта е да се посвети внимание на велосипедите во стратегиите за развој и нивно вклучување во меѓународните, регионалните, националните и локалните развојни политики и програми. Резолуцијата ги потенцира придобивките на велосипедот како едноставен, сигурен, достапен, чист и еколошки одржлив начин на транспорт и го препознава велосипедот како средство за развој, поттикнувајќи ја креативноста и социјалното вклучување за обезбедување пристап до образование, здравје и спорт.