УТРЕ, ТРЕТ ДЕН ВЕЛИГДЕН, СИТЕ ПРАВЦИ ЌЕ ВОДАТ ВО МИРАВЦИ

WEB Телевизија во живо

КУД „ТАНЕЦ“ ОД МИРАВЦИ ПРЕКУ МАНИФЕСТАЦИЈАТА „ЃУРА МАРА“ ГИ ВОЗОБНОВУВА МИНАТОТО И ТРАДИЦИЈАТА
 
Од памтивек, па сè до денешни дни, секој миравчанец, каде и да е, на третиот ден од воскресението Христово си доаѓа во Миравци. Ова е едно од најубавите македонски населени места, убаво не само по природните убавини туку и по питомите, убави, горди и, пред сè, гостопримливи миравчани. Да биде со своите најблиски, на своето родно огниште, за да им оддаде почит на постарите и за да им ги покаже корените на своите помлади поколенија. На овој ден, преку најстарата автентична фолклорна традиција кај нас – „Ѓура Мара“, со впечатливото оро, преубавата носија и со зачуваните обичаи, миравчани испраќаат порака до сите добронамерници кои го посетуваат нивното место. Порака за љубов, заемнo почитување и помагање.
 
А, од орото започнало сè. Преданието вели дека од сите убави моми кои пред стотина години, на тоа исто место, ги извивале своите вити тела во ритамот на тапанот и зурлите, најубава, најлична и најстаситa била момата Мара. И тука настанале проблемите. Меѓу насобраните луѓе се нашле и тројца османлии, кои биле заслепени од убавината на Мара. Имале намера да ја грабнат најличната од селото, па затоа двајца од нив се фатиле на оро. Едниот од едната, другиот од другата страна, а убавата Мара во средина. И додека траела играта, во еден момент, држејќи ја Мара под раце, османлиите се отпуштиле од орото. Влечејќи ја немоќната девојка, почнале да бегаат.
 
Сето тоа се одигрувало пред очите на братот на Мара, Ѓуро. Тој, без да размислува, веднаш потрчал по османлиите, а по него тргнале и другите млади и стари селани. Успеале да ги стигнат, се нафрлиле врз нив и по краткотрајна борба, успеале да ја ослободат уплашената девојка. Некои велат дека во таа борба, за да ја спаси честа на својата сестра, загинал Ѓуро, братот на Мара. Некои велат дека Мара, за да не падне во рацете на османлиите, се фрлила во еден длабок дол. Кој знае. 
Но, како и да било, од тој ден, па сè до ден-денес во Миравци се одбележува овој настан. На истиот начин, со истите песни и ора, со истите велигденски обичаи.
 
Ова оро, како и повеќето други македонски ора, е сведок за голготата низ која поминувал Македонецот, реалистичен фолклорен приказ кој го отсликува животниот пат на Македонците низ времето и ги симболизира македонската вековна гордост и нашите непокор и достоинство.
Па затоа, доколку ве нанесе патот во гевгелискиот крај, за третиот ден од Велигден, не двоумете се многу. Дојдете во Миравци, видете го орото „Ѓура Мара“ и бакнете се за момент со традицијата, која и натаму опстојува.
 
Организатор на оваа преубава манифестација е едно од најстарите културно-уметнички друштва во Македонија, КУД „Танец“- Миравци. Покровители на манифестацијата се Министерството за култура на Република Македонија и градоначалникот на Општина Гевгелија, Андон Сарамандов.
Оваа година гости на друштвото „Танец“ ќе бидат Друштвото за изворем фолклор „Копривнички Иванец“ од Копривница, Република Хрватска, како и делегација на КУД „Паја Зариќ“ од Инџија, Република Србија.

Бесплатно преземање е дозволено со задолжително цитирање на медиумот и хиперлинк до оригиналната содржина на tvnova12.mk.

За сите споделени фотографии (графики), ТВ Нова 12 има екслузивно право да ги користи или истите се превземени од социјалните медиуми, запазувајки го кодексот на "фер употреба" - корисни за општеството (ТВ НОВА 12 има за цел да информира и известува и употребата на фотографиите (графиките) е исклучливо за некомерцијални цели).
Доколку, материјата на фотографиите (графиките): навредува, нарушува углед, или негативно отсликува состојба, или не е запазено авторското право Ве молиме контактирајте не, за да соодветно реагираме!

Напишете коментар

Вашата адреса за е-пошта нема да биде објавена. Задолжителните полиња се означени со *