ПОЧИНА ЏЕФ БЕК, ЕДЕН ОД НАЈГОЛЕМИТЕ РОК ГИТАРИСТИ

Џеф Бек, легендарниот рок гитарист, човекот кој свиреше со пионерите на хеви металот, групата „ Yardbirds“, а потоа беше лидер на бендот „Џеф Бек груп“ со Род Стјуарт , почина на 78-годишна возраст.

Бек починал во вторникот откако „ненадејно заболел од бактериски менингитис“, пишува Гардијан.

 

Често опишуванан како еден од најголемите гитаристи на сите времиња, Бек – чии прсти и палци беа осигурани на 7 милиони фунти – беше познат како голем иноватор. Тој беше пионер на џез-рокот, експериментираше со ефекти на фуз и дисторзија и го отвори патот за потешки поджанрови како што се психо рокот и хеви металот во текот на неговата кариера. Тој беше осумкратен добитник на Греми, добитник на наградата Ајвор Новело за исклучителен придонес во британската музика и беше примен во Куќата на славните на рокенролот и како соло уметник и како член на Yardbirds.

 

Џеф Бек во 2009 година по втор пат беше примен во Куќата на славните на рокенролот и во таа прилика објасни зошто „отскокнал“ од другите гитаристи.

„Свирам онака како што свирам, бидејќи тоа ми овозможува да ги добијам најлудите звуци. И тоа е поентата на сè, нели? Не ми е грижа за правилата. Ако не ги прекршам правилата барем 10 пати во секоја песна, тогаш не си ја работам работата како што треба“, рече Бек..

 

Тој е роден во 1944 година во Валингтон, Јужен Лондон. Како дете пеел во црковниот хор. Почнал да свири гитара како тинејџер, а својот прв инструмент го добил откако се обидел да измами музичка продавница преку шема за купување изнајмување.