ВИДЕО ИНСТАЛАЦИЈА „МРАЧНА ШУМА“ НА МАРИА СТОЈАНОВА

На 25 август 2022 година пред гевгеличани со видео инсталација ќе се претстави Мариа Стојанова, еден од организаторите на фестивалот „БОШ“. Настанот, кој е во организација на Дом на култура „Македонија“, започнува во 20 часот во Народниот театар.

 

МРАЧНА ШУМА е видео инсталација чија цел е евокација на една заборавена архетипска слика. Во мрачната шума е скриена тајна, вели во својот осврт, историчарот на уметноста, Емил Алексиев. Потребен е вашиот поглед за да се случи чудо –мрачната шума е преплавена од светлина и сè одеднаш оживува. Стотици пеперутки излегуваат од темнината и го исполнуваат просторот. Оваа провала на волшебното во нашиот свет создаден од бетон, челик и стакло ги ослободува природните сили затрупани од багерите на нашата цивилизација.

 

Проектот е замислен како дијалог меѓу природата и културата (nature – culture). Марија Стојанова преку јуктапозиција на две слики (една статична, друга подвижна; мрачна шума–пеперутки), поставува битни егзистенцијални прашања во врска со односот помеѓу луѓето и нивниот свет: Како културните влијанија, нашите сопствени истории, традиции, мемории, архетипски претстави, симболични слики од колективната свест и современата цивилизација ги обликуваат нашите животи? Кои се последиците од нашето отуѓување од природата? Дали природата и културата се всушност спротивставени? Можеме ли да размислиме за нашето постоење надвор од природата? Дали уметноста може да ја обнови магијата на природата?