НАШЕ А СВЕТСКО-ЏЕЗ КОНЦЕРТ НА ДУОТО ФИЛИП ДИНЕВ И ПЕНЧЕ КРАЛЕВ

Многу џез музика, многу импровизации, многу ноти, многу публика. Многу добро. Накратко ова е инфото од синоќешниот концерт на дуото Филип Динев-гитара и Пенче Кралев-контрабас, настан кој се случи во рамките на Гевгелиското културно лето, а во организација на Дом на култура. Двајцата одлични музичари кои потекнуваат од ова поднебје, ја разиграа пријатната гевгелиска вечер со спој на класичните и балканските елементи, постојано провоцирајќи спонтаност, а истовремено секогаш отворени и за други влијанија.

 

Гевгеличанецот Филип Динев, еден од највиртуозните и најдобри млади македонски гитаристи и композитори, дел од различни групи, како Гоце Стевковски Сепсет, Филип Динев Светло, Harrison’s Quartet, In Between Quartet, и Пенче Кралев, роден во Валандово, кој свирел со Зарина Прваседва, Тони Китановски Трио, Летечки пекинезери и други, звучеа мошне компактно со своето видување на џез материјалите. На крајот беа наградени, сосема заслужено со аплаузи на публиката која го исполни не само салонот на Народниот театар туку и самото плато пред театарот.