ВЕЧЕР ВО КОЈА „РАСПЕАНИ ГЕВГЕЛИЧАНИ“ ГИ РАЗБУДИЈА СПОМЕНИТЕ ЗА ВРЕМЕТО НА НОЌНИТЕ СЕРЕНАДИ

Во една убава, топла, јулска квечерина, со песната на „Распеани гевгеличани“, присутните, за момент, се навратија на едно старо време, време на ноќни седенки и пеење на серенади под прозорците на младите моми, време кое за жал повеќе го нема. Но, сепак остануваат поединци и групи кои и натаму ја негуваат староградската македонска песна, која секогаш во минатото била придружник и во добрите и во лошите настани од животот на гевгеличани. Просторот на платото пред Народниот театар синоќа го исполнија токму ваквите песни кои разбудија многу носталгија кај присутната публика. Сето тоа организирано од Дом на култура а во рамките на “Гевгелиско културно лето”.