„И ЈАС СУМ ТУКА“ ИЗЛОЖБА И КНИГА ПОСВЕТЕНА НА ЛИЦАТА СО ПОПРЕЧЕНОСТ ВО ПИОНЕРСКИОТ ДОМ ГЕВГЕЛИЈА

Во четврток, на 7 април 2022 година, со почеток во 19 часот, во малата сала на Пионерскиот дом – Гевгелија ќе биде отворена изложба на фотографии на Тоше Огњанов и книга со приказни на новинарката Сребра Ѓорѓиевска со наслов „И јас сум тука. Приказните на Ѓорѓијевска и фотографиите на Огњанов станаа гласници во борбата со стереотипи, предрасуди и стигми кои кружат околу луѓето со попреченост. Со изложбата и книгата „И јас сум тука“, според нив, тие сакаат да ги отворат некогаш затворените очи и уши на нашето општество.

Фотографиите сместени во фото-изложба, а приказните во книга, праќаат своја порака, со иста цел- да потсетат дека и лицата со попреченост се тука, околу нас.
Важни се сите херои во книгите „И јас сум тука“ и „Не престанувај да се гушкаш“. Ѓорѓијевска истакнува дека насловот на книгата дошол многу природно на крајот од проектот.

– Ги најдовме приказните, ги запознавме сите луѓе, децата и нивните семејства, се дружевме. Насмевката на сите овие луѓе е нешто заедничко што зрачи од фотографиите, со тие насмевки ги напуштивме сите тие средби. Дадовме малку љубов, малку внимание, вели Ѓорѓијевска.
Фотографот Тоше Огњанов ќе додаде дека ова е патување на кое тргнал малку наивно, чекор по чекор и по секоја средба тој чекор бил се побезбеден.

– Зачекоривме во свет кој цело време бил тука, покрај нас, не сме имале предрасуди кон него, но со секој следен чекор одевме подлабоко и тој стана дел од нас. Беше спуштена бариерата и успеавме да комуницираме со нив, но не само вербално, туку на секој можен начин.
Целта на проектот, кој е дел од годишната програма за култура на Општина Гевгелија, е да се подигне свеста на лицата со интелектуална попреченост и да се избришат стигмите и предрасудите за овие луѓе и да се помогне целосно да се интегрираат во општеството и да се избегнат оние институционализации и изолации кои се уште се присутни во некои земји