НОВОГОДИШНИ ПАКЕТЧИЊА ЗА ПРВООДДЕЛЕНЦИТЕ ОД ОПШТИНА ГЕВГЕЛИЈА

Градоначалникот на Општина Гевгелија, Андон Сарамандов, денес, го посети ООУ „Владо Кантарџиев“ во Гевгелија, каде на првоодделенците и другите ученици во ова училиште им ја честита Новата година. Истовремено, им посака многу успех во натамошното школување, безгрижно детство и заедничко дружење. За време на посетата на првоодделенците им беа доделени новогодишни пакетчиња, донирани од фирмата „Ветеринар“ во Гевгелија. Градоначалникот Сарамандов изрази благодарност до фирмата „Ветеринар“ за општествената одговорност и за соработката со Општината.

Имено, „Ветеринар“ по традиција, во пресрет на новогодишните и божиќните празници, на сите првоодделенци во Општина Гевгелија им доделува новогодишни пакетчиња. Така и годинава, по деветти пат, покрај на првооделенците во ООУ „Владо Кантарџиев“, новогодишни пакетчиња ќе им бидат доделени и на првоодделенците во ООУ „Крсте Мисирков“ во Гевгелија, ООУ „Ристо Шуклев“ во Негорци и ООУ „Климент Охридски“ во Миравци.