ТВ НОВА 12

Вести во Гевгелија и пошироко

ДЕНЕСКА ЗАПОЧНА РЕКОНСТРУКЦИЈАТА НА МЛАДИНСКИОТ ДОМ ВО ПРДЕЈЦИ

Денеска започна реконструкцијата на Младинскиот дом во населеното место Прдејци. Општина Гевгелија за таа намена доби 12.000.000 денари, средства обезбедени од Буџетот на Република Македонија од пренамена на средствата што беа предвидени за изградба на откажаниот карго аеродром на ТАВ. Жителите на ова населено место долго време бараа реконструкција на овој објект, кој е започнат со средства издвоени од тамошните жители.
На површина од 580 метри квадратни во центарот на населеното место, наместо старото и недовршено здание, ќе никне нов модерен објект. Имено, Домот ќе располага со голема сала за одржување на разни јавни, младински и културни настани, како и придружни простории. Изведувач на работите на Младинскиот дом е битолската фирма „Мегаконс“, а надзорот ќе го врши ГИМ.
На почетокот на изведбените работи на реконструкцијата на Младинскиот дом во Прдејци присуствуваа градоначалникот на општина Гевгелија, Андон Сарамандов, пратеничката во Собранието на РМ, Ангелинка Петкова, членови на Советот на Општина Гевгелија, претставници на ТАВ, на изведувачот и надзорот, како и други гости.
– Ова е значаен настан за граѓаните на Прдејци бидејќи изградбата на објектот започнала пред повеќе од три децении, но никако не била завршена. Со реконструкцијата конечно ќе се обезбедат простории за одржување на младински, културни и други општествени настани во Прдејци. Покрај одобрените средства, општина Гевгелија треба да обезбеди опремување на Младинскиот дом. Во наредниот период ќе настојуваме да ги интензивираме активностите за реализација на одобрените проекти во секое населено место. Во прв ред, изградбата на прочистителна станица во Смоквица и Милетково, водоводна линија со препумпна станица во Ума, но и други инфраструктурни проекти во другите населени места, изјави градоначалникот на Општина Гевгелија, Андон Сарамандов.
 
 
 
 
 
 

Бесплатно преземање е дозволено со задолжително цитирање на медиумот и хиперлинк до оригиналната содржина на tvnova12.mk.

Напишете коментар

Вашата адреса за е-пошта нема да биде објавена.