„ЦРТЕЖИ И СКУЛПТУРИ“-ИЗЛОЖБА НА МАКЕДОНСКИОТ УМЕТНИК РАНКО ДАКИЌ ВО УМЕТНИЧКАТА ГАЛЕРИЈА „АМАМ“

„Цртежи и скулптури“ е насловена изложбата на македонскиот уметник Ранко Даќик која од 13 Октомври ќе биде поставена во Уметничката галерија Амам во Гевгелија, каде ќе бидат претставени неговите најнови цртежи, но и избор од неговите скулптури од периодот 2005-2015 година.

Ранко Дакиќ е роден во Скопје 1958 година. Завршил училиште за применета уметност во Скопје и дипломирал на Факултетот за ликовни уметности во Скопје. Од 1987 година живее и работи како самостоен уметник во Берлин и Кавадарци. Член е на ББК (Асоцијација на професионални уметници на Берлин). Реализирал повеќе самостојни изложби во Германија и Македонија.

„Во неговото досегашно творештво – сликарско и скулпторско – не функционира ниту една уметничка формула или „законитост“ (на развој, на стил, на континуитет…), стереотип или поводливост. За него уметноста е вечна борба, постојан судир со себе, психотерапија, самопрогон, некогаш ништавило, но и спас, аждер што бара жртва – ако си подготвен да се жртвуваш! Затоа, можеби, секое негово дело е негова победа над себеси, над „уметноста“, над процесот на создавањето. Секое негово дело е крај на едни мечти и илузии, тегоби и стравови, надежи и очекувања, победи и порази… и почеток на нови, исти такви предизвици коишто, барем досега, Дакиќ мајсторски ги надминувал“ – вели за творештвото на Дакиќ Златко Теодосиевски, кој е и куратор на изложбата.

Настанот е во организација на Музеј на град Скопје и соработка со Н.У.Музеј – Гевгелија, поддржан од Министерство за култура на Р. Северна Македонија. Изложбата ќе биде организирана во согласност со сите актуелни важечки протоколи и мерки за организирање на настани од овој тип.