ТВ НОВА 12

Вести во Гевгелија и пошироко

ПЕТКО ПЕТКОВ-ШЕКИ, НАЈДОБРИОТ ФУДБАЛЕР НА ФК „КОЖУФ“ И СПОРТИСТОТ НА 20-OT ВЕК ОД ГЕВГЕЛИЈА, НАПОЛНИ 75 ГОДИНИ.

Петко Петков (Ташев), легендата на гевгелискиот и воедно македонскиот фудбал, пред некој ден наполни 75 години. Роден е во Гевгелија, во 1946 година а своите први фудбалски чекори ги започнал на 16 години во ФК „Кожуф“, еден од најстарите фудбалски клубови во Македонија. Во својата 17 годишна кариера освен за својот „Кожуф“, настапувал и за „Победа“ од Прилеп, како и за „Борец“ од Велес. Каде и да настапувал, Петков ги воодушевувал сите љубители на фудбалот поради својата извонредна техника и бравурозните дриблинзи. Поради тоа навивачите на „Кожуф“ му го дале и прекарот Шеки. И денес, фудбалските стручњаци го сметаат Петко Петков за еден од најдобрите техничари што се појавиле на фудбалските терени во Македонија.
Во неговата кариера, се му е подредено на бројот 500, има постигнато над 500 голови, има над 500 асистенции и одиграл над 500 званични фудбалски натпревари.
Во 2000 година во организација на Подрачната единица за спорт и млади и Радио Телевизија Гевгелија беше организирана спортска манифестација за избор на 10 најдобри спортисти на 20-от век од Гевгелија. Во тој избор, првото место го поделија токму Петко Петков и интернационалниот мајстор и светски првак во проблемски шах, Живко Јаневски.
Петков, фудбалската кариера ја завршил во 1979 година, а на прашањето кој натпревар му е најдраг тој одговори
„ Без конкуренција, тоа е натпреварот со Победа од Валандово за тоа кој ќе влезе во Македонската фудбалска лига. Игравме во Гевгелија, пред преполн стадион, го добивме натпреварот со 5-1, а јас постигнав хет-трик. На стадионот, на крајот на натпреварот настана вистински делириум, а и ден денес во ушите ми одзвонува извикувањето на моето име од страна на навивачите.“
На пригодната прослава што беше организирана по повод Изборот на спортист на векот, се одигра и ревијален натпревар помеѓу ветераните на ФК „Кожуф“ и ветераните на Македонската фудбалска репрезентација, на која продефилираа Митановски, Андреев, М и Г Каракабакови, Беќаров, Линков, Апостолов, Димитровски, Јанев, Аџиоски, Кадиев, Милошовски, Костов, Трајков и нормално Петков, од Кожуф, кaко и Панчев, Јовановски, Kанатларовски, Трајановски, Здравков, Георгиевски, Маџунаров и Стојковски oд Македонската фудбалска репрезентација.
Цела една историја собрана во 17 годишната кариера на популарниот Шеки. На крајот, Шеки, мајсторе, нека ти е среќен 75-от роденден, добро здравје и терај до 100-ка.

Бесплатно преземање е дозволено со задолжително цитирање на медиумот и хиперлинк до оригиналната содржина на tvnova12.mk.

За сите споделени фотографии (графики), ТВ Нова 12 има екслузивно право да ги користи или истите се превземени од социјалните медиуми, запазувајки го кодексот на "фер употреба" - корисни за општеството (ТВ НОВА 12 има за цел да информира и известува и употребата на фотографиите (графиките) е исклучливо за некомерцијални цели).
Доколку, материјата на фотографиите (графиките): навредува, нарушува углед, или негативно отсликува состојба, или не е запазено авторското право Ве молиме контактирајте не, за да соодветно реагираме!

Напишете коментар

Вашата адреса за е-пошта нема да биде објавена. Задолжителните полиња се означени со *