ДОМОТ НА КУЛТУРАТА УСПЕШНО ЈА РЕАЛИЗИРАШЕ МУЗИЧКАТА РАБОТИЛНИЦА ПОСВЕТЕНА НА ТРАДИЦИОНАЛНИОТ ИНСТРУМЕНТ-ТАПАНОТ

Дом на култура “Македонија” реализираше уште една работилница поврзана со традиционалната култура. М-р Христијан Николовски, професор во ДМБУЦ “Илија Николовски Луј” и асистент на катедрата за етнокореологија на Музичката академија на УГД – Штип, успешно го претстави, пред околу дваесеттина заинтересирани гевгеличани, методскиот аспект за начинот и процесот на изработка, техники и стилови на музицирање, како и основни вежби и начин на свирење на традиционалниот инструмент ТАПАН.

 

Самиот Николовски е виртуоз и изработувач на овој инструмент. Ваквиот вид работилници, најавуваат од Дом на култура „Македонија ќе продолжат и во иднина и за нив учесниците не плаќаат никаков надомест.

Инаку, тапанот е удирачки народен инструмент направен од буково, оревово или костеново дрво и покриен со штавена овча или козја кожа од двете страни. Кожите се оптегнати преку два обрача и се затегнати со јажиња кои дијагонално одат од едниот до другиот обрач. Тој се свири со две посебни палки: кукуда и прачка. Кукудата се прави од оревово дрво и по облик е нешто налик на луле. Прачката пак е тенка, и обично се прави од кучешки дрен или врба. Тапанџијата го чува тапанот нарамен со ремен во малку наведната положба за да може да удира со кукудата од едната страна, а со прачката од другата. Кожите се затегаат со нагорно повлекување на јажињата, едно по едно. Предвиден е да ја издржи тежината на возрасен човек при изведбата на народни игри и ора.

 

За тапанот се знаело уште во неолитот. Во Македонија постојат средновековни ѕидни цртежи (помеѓу 14 и 16 век) со тапанари и други музичари. Ретко се користи како соло инструмент. Обично се свири заедно со други инструменти, особено со зурли. Овој начин на свирење резултира во мешавина од длабоки и високи звуци, со комплексен ритам и непредвидлив ритмички израз.