СВЕТА ПЕТКА ЛЕТНА, ЗАШТИТНИЧКА ОД НЕСРЕЌИ И БОЛЕСТИ

Во Гевгелиско денот на Света Петка се празнувал во с. Прдејци каде што е панаѓур, имало селска служба и каде што се собирал мноштво народ од соседните села. Овде Света Петка се сметала за сестра на Света Недела. Православниот храм посветен на „Света Петка“ во ова населено место е изграден од Андон Китанов.

Петковден како домашен празник со служби посветени на св. Петка, со чекање гости и со други обичаи и свечености го празнуваат голем број македонски семејства.

Именден празнуваат: Петко, Петкана, Параскева, Пенка..

Култот кон света Петка, кај нашиот народ е многу раширен. Таа се смета за заштитничка од разни несреќи, но и од многу болести. Со нејзиното име се поврзани и чудотворни икони и многу лековити води наречени петочни води. Оттука и празнувањето на петокот како посебно тежок ден во неделата. Според некои записи од минатото во некои наши краишта (Мариово) петокот се празнувал повеќе од неделата. Во православниот каландар постојат три личности со исто име света Параскева-Петка, поради што кај народот најчесто се мешаат и се мисли дека се работи за иста личност.

 

Првата е света Петка-Римјанка, втората света Петка од Иконија и третата света Петка Епиватска, позната и како Трновска. Најпозната меѓу нив е третата на која празникот, познат под името Петковден и со домашни слави се празнува на 27/14 октомври. Поради тоа и другите две се идентификуваат со неа.