РЕКРЕАТИВНО ВОЗЕЊЕ „ПЕНЗИОНЕРИТЕ НА ВЕЛОСИПЕД“ ВО ГЕВГЕЛИЈА

Денеска, Здружението на пензионери од Гевгелија, по втор пат го организираше рекреативното возење за своите членови „Пензионерите на велосипед“. Убавото време ги „извади“ од своите домови над педесеттина пензионери од општина Гевгелија, кои учествуваа во рекреативното возење од Гевгелија до Негорските бањи и назад. Како што не информираше претседателот на Здружението, Велин Стојменов, на ова рекреативно возење, пензионерите велосипедисти беа придружувани од полициско возило и возило на Брзата помош, а ова беше убава можност, истакна Стојменов, после сите проблеми создадени од пандемијата на коронавирусот, пензионерите да поминат извесно време во природа, на чист воздух и воедно да се рекреираат.