НА 9 АВГУСТ 1883 ГОДИНА ВО ВЕЛЕС Е РОДЕН ПАНКО БРАШНАРОВ, ПРВ ПОТПРЕТСЕДАТЕЛ НА АСНОМ

„Во овој момент, во ова историско место „Св. Отец Прохор Пчињски” и на овој историски ден ИЛИНДЕН , кога објавувам да е отворено Првото Антифашистичко собрание на народно ослободување на Македонија, душата ми е преполна со радост и пред премрежените очи гледам како се раздвижиле сите реки од Пчиња и Вардар до Места и Бистрица, заплускујат е целата македонска земја, сакајќи да измијат од македонскиот народ десетвековниот ропски срам од пропаста на Самуиловата држава, за да се роди денеска нова, светла и слободна македонска држава”, ќе им се обрати на присутните со треперлив глас велешкиот учител, македонски национален деец, комунист, хуманист, воденичар, кафеџија, градинар и слуга, најстар пратеник на Првото заседание на АСНОМ, прв претседавач на Заседанието и прв потпретседател на АСНОМ, прв повереник на првата привремена влада на Македонија и иницијатор за формирање на првата новинска агенција на Македонија, најблизок соработник на Методија Андонов – Ченто. Умрел на Голи Оток, на 13 јули 1951 година. Панко Брашнаров е човечки израз на македонската самобитност, непокор и желба за живот во самостојна и независна држава.