„Осветлување, освестување, откривање, ослободување…“ е насловот на самостојната изложба на Ивона Велковска, која ќе биде отворена утре, понеделник, 1 јули 2024 година во Уметничката галерија „Амам“ во Гевгелија.
Самата авторка посочува дека сликите се дел од повеќегодишен истражувачки процес, кој можеме да го разгледуваме и како вид дневник на визуелни записи на едно духовно истражување, патување, проникнување, разоткривање и манифестирање на различни нивоа на нашата свест и нашето постоење.
„Сликите произлезени од внатрешниот свет се трансформирани во апстрактен ликовен израз, кои носат ликовна универзалност, преку која го откриваме и оној дел од нас кој е секогаш безграничен, слободен, а кој во сегашното постоење и живеење изобилува со различни наметнати ограничувања, блокади, притисоци што ги доживуваме на сите нивоа: физичко, емоционално, егзистенцијално, енергетско, интелектуално, духовно…“, вели авторката Ивона Велковска.
Ивона Велковска дипломира на Универзитетот „Св. Кирил и Методиј“ на Факултетот за ликовни уметности во Скопје, во 1999 година, во класата на проф. Рубенс Корубин. Како ликовен педагог и професорка во средното образование, таа учествува во бројни државни и меѓународни проекти, изложби и манифестации во Република Северна Македонија и странство. Нејзините дела се дел од бројни домашни и странски каталози и приватни колекции.
Досега Ивона Велковска има реализирано пет самостојни изложби. Од 2008 година, таа е активен член на Друштвото на ликовни уметници на Македонија (ДЛУМ), а во 2015 година е добитник на наградата за минијатура од НЛБ на „МиниАртура“. Таа е учесник на повеќе од 80 групни изложби во Република Северна Македонија и во странство.