МАГДА АНГОВА „ВРСНИЧКОТО НАСИЛСТВО СТАНУВА СЕ ПОЧЕСТ ПРОБЛЕМ ВО ОСНОВНИТЕ УЧИЛИШТА“

Врсничкото насилство односно булингот е се почест и горлив проблем со кој се соочуваат се голем број основци и средношколци во државата. Насилството помеѓу врсниците често останува недетектирано, непрепознаено од страна на стручните лица во училиштата, а премолчано од страна на жртвите на булингот. Токму тоа беше повод, Општина Дојран, односно координаторката за еднакви можности помеѓу жените и мажите од општината, Магда Ангова да организира предавање со стручни лица на оваа важна тема за младите кои се уште се во фаза на раст и развој.                                                                  

Во соработка со стручни лица од Центарот за социјални работи Гевгелија, психологот Сашка Карајанова, педагогот Софија Ручкоманова и образовниот асистент, односно дипломиран социјален работник Анита Василева извршија обуки на сите ученици од основното училиште “Кочо Рацин” од Нов Дојран. Тимот дури и ги посети сите подрачни училишта во населените места од општината и разговараа со учениците и наставниот кадар. Задоволството од обуката беше обострана, а децата покажаа огромен интерес за работилници од ваков тип кои ќе се одржуваат интензивно од следната учебна година.                                    

Заклучокот од предавањата е дека насилството не смее да се толерира, уште помалку да биде премолчено и жртвата емотивната болка од насилството да ја потиснува во себе. Учениците даваа свои примери, некои од нив за жал биле и жртви на врсничко насилство, а голем број изјавија дека биле и сведоци на булинг, односно врсничко насилство.

 

Помош постои, истата само треба да се побара, беше слоганот на неколкудневните работилници кои се одржаа во Општина Дојран, односно основното училиште “Кочо Рацин”.