ВИРТУОЗЕН НАСТАП НА „КВИНТЕТО“ ЗА КРАЈ НА ЈУЛСКАТА ПРОГРАМА НА ГЕВГЕЛИСКО КУЛТУРНО ЛЕТО

Синоќа, на платото пред Народниот театар во нашиот град, во организација на Дом на култура Гевгелија, настапија членовите на бендот Квинтето, Игор Бакревски – кларинет, Владимир Лазаревски – обоа, Кристијан Кожумановски – бас гитара, Благоја Антовски – тапани и Марко Виденовиќ – виола, клавијатури, кои со својот репертоар ги разгалија душите на присутната публика.

 

Музиката на Квинтето е своевидна магична фузија на етно-џез, cross over, а понекогаш и со примеси на класика. Уникатната комбинација на инструменти – што ги вкрстува класичните тонови на обоа и виола со популарните ритми на бас гитара и тапани, надополнети со кларинет – создава извонредна палета на музички бои што го дефинираат препознатливиот звук на овој состав.