ТЕАТАРСКА ПРЕТСТАВА „АУДИЦИЈА“ НА ПРИЛЕПСКИОТ ТЕАТАР „ВОЈДАН ЧЕРНОДРИНСКИ“

„Аудиција“ од репертоарот на НТ „Војдан Чернодрински“- Прилеп е театарската претстава која гевгеличани ќе имаат можност да ја проследат во рамки на седмоноевриската културна програма, во Народниот театар- Гевгелија, со почеток во 20:00 часот. Во претставата играат: Марија С. Илијеска, Даниела Иваноска, Ангела Наумоска, Сара Спиркоска, Јасмина Мицовска Станкоска, Наташа Ачански, Илија Волчески, Александар Тодески, Игор Трпчески, Зоран Иваноски и Михајло Миленкоски.

 

Режијата е на Владимир Милчин, преводот на текстот од Александар Галин е на Сузана Киранџиска, изборот на музиката на режисерката Ема Маркоска Милин, сценографијата е на Крсте С. Џидров, а костимографијата на Марија Пупучевска.

„Аудиција“ е горчлива комедија за најголемата моментална општествена болка – иселувањето. Претставата која е играна во целиот свет, а за првпат во земјава пред 10-тина години, конкретно го лоцира местото – се случува во државава во овие моменти и отвора дилеми: да се остане и да се соочиме со состојбите или да се замине по подобар живот. Да се подели живеењето на два дела – едно е овде, а другото е неизвесно таму некаде.

 

-Авторот на текстот, Александар Галин и јас сме врсници, но сме живееле во различни светови. Сепак заедничка и денес многу актуелна е темата за заминувањето од земјата во некое друго општество. Тоа е најстрашната сличност. Би рекол, дека во овој момент ова е најактуелната пиеса во која можеме да се препознаеме и што сѐ правиме работите да ги влошуваме и младите, а не само тие, да заминат одовде. Кога го направивме преводот, го ставивме поднасловот – горчлива комедија. Галин создава текстови кои „болат“. Ние истовремено се смееме и плачеме. Нашава претстава става јасни маркери каде се случува – во Македонија.