СО ФИЗИЧКО ПРИСУСТВО ЗАПОЧНА ШКОЛСКАТА ГОДИНА ВО ГЕВГЕЛИЈА

Брзај брзај прваче

кон школскиот двор

те чека учителка

со мајчински збор.

Букви, сказни, песнички

на секој нов час

таа ќе ти кажува

со милослив глас.

Брзај брзај прваче

ѕвонче шири глас

децата се собрале

за првиот час

Денеска започна школската година, и таа ќе биде со физичко присуство, после една и пол година поради пандемијата. Минатата година само учениците од прво до трето одделение беа со физичко присуство, додека останатите посетуваа настава он-лајн.

Во општина Гевгелија, заѕвони училишното ѕвонче во сите основни училишта и Средниот општински училишен центар. Најрадосни беа 234 првачиња кои за првпат седнаа во училишните клупи. Нив, срдечно добредојде им посакаа директорите на училиштата и нивните наставници. На приемот на првачињата во основните училишта „Крсте Мисирков“ и „Владо Кантарџиев“ присуствуваше и градоначалникот на општина Гевгелија, Сашо Поцков. Тој, на сите ученици и наставници им посака многу успех во совладувањето на училишните лекции, стекнување нови знаења и заедничко другарување.

Тој, во изјава за ТВ Нова 12 истакна дека сите гевгелиски училишта подготвено го пречекаа стартот на новата школска година. Во сите нив е извршена дезинфекција, дезинсекција и дератизација на училишните објекти. Обезбедени се, исто така, сите хигиенски и дезинфекциони средства и останатите потребни ресурси за доследно почитување на протоколите и заштитните мерки, и за учениците и за вработените. Со оглед на процентот на вакцинирано население во општина Гевгелија, кое е околу 60 проценти, и процентот на вакцинирани наставници и помошен персонал, кој е околу 80 проценти, Поцков истакна дека нема никакви пречки наставата да биде реализирана со физичко присуство.