ГЕВГЕЛИСКИТЕ ТАКСИСТИ БАРААТ ЗГОЛЕМУВАЊЕ НА ЦЕНАТА НА ТАКСИ ПРЕВОЗОТ

На наредната седма седница на Советот на Општина Гевгелија, која ќе се одржи на 15 март 2022 година, на дневен ред ќе се најде и Барањето на такси превозниците за измена и дополнување на  Одлуката за авто-такси превоз на патници во Општина Гевгелија.

Во ова барање, гевгелиските  таксисти предлагаат   цената на стартот, за 1,5 километри,  од 50 да се зголеми на  80 денари, за секој нареден километар да се наплаќа, наместо досегашните 23, по 33 денари, додека цената на чекање да изнесува 6 денари за 1 минута, наместо досегашните 4.

Исто така, такси превозниците бараат воведување на ноќна тарифа во времето од 22,00 до 06,00 часот со стартна цена од 90 денари и 35 денари за секој изминат километар, како и празнична тарифа со стартна цена од 100 денари и 40 денари за секој нареден изминат километар.

Такси превозниците во своето барање предлагаат и укинување на задолжителната жолта боја на такси возилата, како и паркинг простор за 4 возила пред Амам барот и за 3 возила пред Градскиот пазар.

Како причина за ова нивно барање таксистите го наведуваат зголемувањето на цената на горивата.