СОУ „ЈОСИФ ЈОСИФОВСКИ“ ПРЕКУ ЗБОРОВИ, МУЗИКА, ПЕСНА И КВИЗ ГО ОДБЕЛЕЖА ЕВРОПСКИОТ ДЕН НА ЈАЗИЦИТЕ 26. СЕПТЕМВРИ.

Европскиот ден на јазиците ни дава можност да ги цениме и промовираме сите јазици и култури во Европа. Од 2001 година, 26 септември е Европски ден на јазиците. Овој ден е посветен на промовирање на јазичната и културната разновидност во Европа, политиката за повеќејазичност и потребата на европските граѓани да учат и да го зајакнат своето познавање на повеќе европски јазици.

Иницијативата за одбележување на овој ден беше иницирана од Советот на Европа, која беше поддржана и од Европската унија. Денес, овој ден се слави во сите 47 земји-членки на Советот на Европа. Институциите, институциите и невладиниот сектор во земјите членки на Советот на Европа преку низа активности организирани на 26 септември ги потсетуваат граѓаните на важноста за доживотно учење и подобрување на јазичните вештини од сите возрасти, преку формално и неформално учење.

Со стиховите од Гане Тодоровски:

“Зборот го болуваш, Болот го зборуваш,

не го преболуваш, не го прегоруваш

и ќе те сотрат еден ден чинам

или убавите жени или лошите вина!“

учениците од СОУ ,,Јосиф Јосифовски “ од Гевгелија и нивните ментори ја започнаа манифестацијата во чест на денот 26 Септември – Европскиот ден на јазиците.

Манифестацијата се одржа во училишната аула, а содржините беа изведени на повеќе јазици.

Преку кажаниот и запишан збор, преку музиката и песната учениците покажаа дека јазиците немаат граници, тие припаѓаат секому, секаде и секогаш. Програмата започна со песната ,,Behold How Good“, на англиски, еврејски и македонски јазик во изведба на III 1 клас, под менторство на професорот Јове Самарџиев. Стиховите од песната „Ленка“ на Рацин, на македонски, англиски, германски, словенечки, српски и романски јазик беа во изведба на учениците: Јована Дупарова, Костадин Узунов, Јован Грозданов, Марија Проданова, Бојана Басова, Ата Теодор Аслан и Катерина Јовановска, под менторство на професорката Даниела Џишева.

На овој настан беше реализиран и квизот ,,Јазицирајте се“, подготвен од професорите: Кристина Пренда, Горан Манев, Ани Џинова и Емилија Дуганова, каде учениците имаа можност да ги покажат своите знаења за различните јазици. Во текот на настанот ученици под менторство на професорите Славица Маркова, Бисерка Макревска, Ивана Кркотиќ – Прошевска, Мирјана Чамџиќ и Вања Манчева, изработија повеќе хартиени паноа со креативно цртање и пишување на азбуки, зборови и афоризми на различни европски јазици. За ликовната работилница одговорна беше професорката Розета Картова, а за промоција на Малата слободна библиотека, професорката Жаклина Атанасова.

Програмата ја заврши ученичката Ања Поп-Костова која изведе музички композиции на турски и македонски јазик.

Исто така професорите: Емилија Дуганова, Кристина Пренда и Јован Самарџиев подготвија краток филм со пораки кажани на повеќе светски јазици.

Водители на настанот беа Зоран Кундурџиев и Весна Делева под менторство на професорките Даниела Џишева и Ивана Кркотиќ-Прошевска.

Медиумскиот клуб „Јоска“ беше задолжен за информирањето и фотографирањето на активностите од настанот.