ПРОМОЦИЈА НА КНИГАТА „СЕКСУАЛНА АЗБУКА“ НА ТАТЈАНА АЛЕКСИЌ

Утре, 6 септември (среда) 2023 г. во 19:00 часот на платото пред библиотека „Гоце Делчев“ во Гевгелија ќе биде промовирана книгата „Сексуална азбука“ од Татјана Алексиќ, професорка по македонски јазик и литература и медиумско лице препознатливо во јавноста по истоимената едукативно-информативна емисија од забавен карактер, каде свое учество зедоа медицински лица, претставници од верските заедници и високообразовните установи.

За книгата се вели дека претставува лексикон или азбучник во која што експликациите на сексолошките термини се преплетуваат со духовити културолошки вметнувања и асоцијации.

„Во текстуалните објави ќе препознавате интелектуална борба против предрасуди, која и во 21 век е борба со диносауруси; императиви за здрав сексуален живот што е повеќе од половина здравје; култ кон интимноста како светиња; разбивање на митови во врска со сексуалноста многу често штетни за севкупното психофизичко здравје и можност за вистински информации во вистинско време, базирани на стручна литература и белетристика. […] На шега дојдовме до оваа книга.

Објавувавме колумни, кои потоа ги преточивме во книга. Немам порив да напишам книга – белетристика, но овде се работи за лексикон, азбучник на сексуални термини, на шеговит начин. Има интересни урбани ликови кои даваа изјави за одредени букви“ вели професорката Алексиќ.

Модератор на настанот ќе биде Емилија Старделова, додека по настанот ќе пушта музика DJ Mitrik.