ДВЕ ГОДИНИ ОД ПРЕОСВЕТУВАЊЕТО НА ЦРКВАТА „СВЕТИ КИРИЛ И МЕТОДИЈ“ВО ГЕВГЕЛИЈА

Пред две години, на 19 септември 2021 година, со архиерејска литургија со која чиноначалствуваше Митрополитот Повардарски, г. Агатангел, со членовите на Светиот Архиерејски Синод при Македонската православна црква- Охридска Архиепископија, Високопреосветениот Митрополит на Преспанско Пелагониската епархија, г.Петар, Високопреосветениот Митрополит на Брегалничката епархија, г. Иларион, Високопреосветениот Митрополит на Европската епархија, г. Пимен, како и свештенството на Повардарската епархија, беше преосветена Црквата „Свети Кирил И Методиј“ во Гевгелија, по што се отслужи и света Божествена литургија, со учество на градскиот мешан хор „Гортинија“.

 

Пред многубројните верници, по преосветувањето на Црквата „Свети Кирил и Методиј“ која во периодот од 2017 до 2021 година беше комплетно надворешно и внатрешно преуредена, и со нов фрескоживопис, Митрополитот Повардарски, г. Агатангел истакна :

 

„Посебна чест и радост ми претставува што е преосветен овој духовен светилник кој е посветен на светите рамноапостоли и сесловенски просветители, Кирил и Методиј. Храмот е место каде сеприсутноста на Бога е посебно изразена, затоа што тоа е Божји дом, во кој што господар е самиот Бог а свештениците се „управници на тајните божји“.Храмот е спасоносен брод, каде што се одмараме од надворешното себељубие и интерес, од сите животни бури, а се предаваме на љубовната топлина што ни ја даваат Христос и неговите светители, пристаниште во лое човек наоѓа мир и заштита.

 

Спасителот, Господ Исус Христос да го помилува нашиот народ, а овој обновен духовен горостас во срцето на Гевгелија нека биде симбол на непоколебливата вера на македонскиот народ и нова надеж за уште поголем духовен и егзистенционален раст на градот и неговите жители, кои во лицето на светите рамноапостоли и сесловенски и семакедонски просветители Кирил и Методиј, имаат големи закрилници и застапници пред престолот на Севишниот Бог.

Во името на целиот македонски народ, тој им се заблагодари и на сите добротвори кои сестрано помогнаа да се обнови Црквата Свети Кирил и Методиј.

 

Инаку, Цркавата Свети Кирил и Методиј, според натписот на плочата на источниот ѕид, е подигната во 1896 годин, вѕидан над олтарната апсида од надвор. Тоа значи дека оваа година Црквата слави 125 години постоење. Таа е изградена на местото каде што во 1881 година бил изграден параклис. Храмот е обновен во 1946 година. Во 1983 година е подигната нова камбанарија со градски часовник.

 

Според својата архитектурна форма, таа е трикорабна градба, со рамни дрвени тавани и со покривна конструкција на две води. Црквата има голем и убав иконостас, чии икони ги работел зографот Димитриј Андонов – Папрадишки. Дверите на црквата се од постаро време и се смета дека се пренесени од старата црква „Света Троица“ или од манастирската црква „Св. Спас“ во Гевгелија и се дело на непознат резбар од XVIII век. Градител на црквата е Андон Китанов.