ПРОГРАМАТА СО ЕТНОГРАФСКИ ФИЛМОВИ ВО РАМКИТЕ НА „53.ИЛИНДЕНСКИ ДЕНОВИ“ ЗАВРШУВА СО ДОКУМЕНТАРЕЦОТ „ЛАЗАРЕНКИ“

Програмата со етнографски филмови, се реализира во рамки на фестивалот „Илинденски денови“, а на 26 јули, односно на денот на завршувањето ќе биде емитуван и документарецот „Лазаренки“ на Силвестер Проле, проект реализиран под покровителство на Општина Гевгелија. Овој филм, во рамките на Гевгелиското културно лето имаа можност да го видат и гевгеличани, во организација на Дом на култура „Македонија“.

 

Проектот „Лазаренки“е во продукција на ЈОУ Дом на култура „Македонија“ и е дел од програмата за реализација на проекти во областа на културата за 2023 година на Општина Гевгелија, којашто воедно е и покровител на проектот. Во филмската адаптација се прикажани обредите и обичаите кои се поврзуваат со празникот Лазарева сабота, една недела пред големиот христијански празник Велигден.

 

Иницијативата во рамките на фестивалот да заживее и филмот како медиум, го создаде минатата година и Интернационалниот етнографски филмски фестивал, кој годинава се одржува по втор пат и носи 21 филмски наслов од 19 земји. Селектор на фестивалот е познатиот македонски новинар кој живее во Франција, Тони Гламчевски и кој заедно со својата сопруга таму организираат фестивал кој ги надмина нивните национални граници.

 

На средбата со новинарите селекторот Тони Гламчевски истакна:

„Втора година по ред, овој интердисциплинарен фестивал претставува голема средба околу етнографскиот филм. Тоа им овозможува на различни, често далечни култури и традиции да се сретнат, да разговараат и да размислуваат за етнографијата и предизвиците низ кои минува општеството. Ова е со цел да се поттикнат истражувачки и креативни пристапи во етнографските документарни филмови, да се едуцира публиката за богатството и различноста на локалните културни традиции, како и да биде глас на совеста за проблемите на современите општества предизвикани од потценувањето на вредноста на културното наследство.“