ГЕВГЕЛИСКИТЕ СОВЕТНИЦИ НА 14-ТА СЕДНИЦА ЌЕ РАСПРАВААТ, МЕЃУ ДРУГОТО, И ЗА КВАРТАЛНИОТ ИЗВЕШТАЈ НА ЈПКД „КОМУНАЛЕЦ“
Советот на Општина Гевгелија ќе заседава на 31 август, 2022 година. На 14 седница, Советот ќе расправа по Предлогодлука за кофинансирање на проектот: „Градење инфраструктура за заштита на животната средина и подобрен квалитет на живот“, со кој Општина Гевгелија ќе аплицира на Oтворениот повик на Центарот за меѓународна соработка и развој на Република Словенија.
Станува збор за проект со повеќе активности, а една од нив е изградба на фекална канализација во с. Милетково. Исто така, ќе бидат разгледани и Годишните планови за вработување на Општина Гевгелија, JОУДГ „Детска радост“- Гевгелија и ЈОУ Дом на култура „Македонија“- Гевгелија, како и Годишните извештаи за работата во 2021/2022, Годишните програми за работа во 2022/2023 година и Годишните програми за екскурзии за 2022/23 година на општинските основни училишта.
Од работењето на ЈПКД „Комуналец“- Гевгелија, на дневен ред на оваа седница ќе се најдат Кварталниот извештај за периодот 1 јануари-30 јуни, 2022 година, Измената и дополнувањето на Годишниот план за вработување за 2022 и Годишниот план за вработување за 2023 година. Седницата ќе биде одржана во Малата сала на Народниот театар, со почеток во 10:00 часот.
