ВАКА ГОВОРЕШЕ ЃУРГИЦА ЌАЕВА НА СЕКОЈ 5 МАЈ, СВЕТСКИОТ ДЕН НА ПУЛМОНАЛНАТА ХИПЕРТЕНЗИЈА

WEB Телевизија во живо

„Доаѓа 5 Мај-одбележување на Светскиот ден за Пулмонална хипертензија. Се одбележува насекаде и од секаде пристигнуваат новости за унапреден третман, за начин на дијагностика, нови лекови, рехабилитациони успешни програми, успешно трансплантирани пациенти. Но, за што можеме ние да се пофалиме, ние како македонско здружение кое ги застапува правата на пациентите со Пулмонална артериска хипертензија.
Останавме на црната точка од декември и празните ветувања на Министерството за здравство дека е крај на таа агонијата и пациентите со секундарна пулмонална хипертензија нема да умираат чекајќи лекови.
Пу, пу не важи…
Дали овие ветувања беа за да не замолчат, затоа што за смртта на чичко Борис се бараше изговор дека бил стар и таа терапија не подлежи под фонд за стари лица , а не можеше да си ја купи бидејќи е скапа. Кој е сега изговорот за потребната терапија за децата, дали е дека болеста е секундарна и здобиена од друга причина?
Секако ова не е нешто непознато, со години талкаме во системот без здив секој со своја приказна, ветувања од различни министри, влади и на крај истиот исход.
Се будат од сон кога ќе почине некој од нас, како Јагода, чичко Мичо, младиот Нехат, но тоа трае за кратко.
И сега кој е на ред? Дали ќе бидам јас, се прашувам често. Не изгледам како да сум болна, но мојот белодробен притисок моментално е 100, а нормален е 25. Потребна е комбинирана тројна терапија, а одвај ја добиваме и другата. Секако благодарна сум, иако не е најнова, но е генеричка. Дали ќе ви биде мирна совеста тогаш, еден помалку од ретките кој што многу зборува.
И немојте да ме прашувате кои се моите барања и моите потреби. Јас, како пациент имам барање за право на живот. Дали е тоа доволно и нормално барање?
Што не е јасно во цела приказна? Се бориме за здив, дали примарна или секундарна, исто е, пациентите тешко дишат. Основното право за живот ни е одземено поради болест која секој може да ја добие.
На 5 Мај на Светскиот ден за Пулмонална хипертензија, нема да барам од министрите да трчаат со нас, затоа што немаме ист маратон, нема да барам да ги офарбаaт пурпурни зградите, па и цела Македонија да ја офарбаат тој ден, се е тоа џабе. Затоа што, тоа е нешто како цреша на торта и кое се прави во држави каде пациентите имаат се, од третман, до социолошка, психолошка подршка, социјално подржани.
До последен здив ќе се борам и зборувам.“
Така зборуваше и така се бореше до последниот здив за сите пациенти со пулмонална хипертензија, Ѓурѓица Ќаева, Претседател на асоцијацијата на пулмоналната хипертензија на Македонија “Момент плус која, за жал пред две години ја загуби битката со оваа подмолна болест..
Ѓурѓица, нека ти е вечна слава.
5 Мај е светскиот ден на пулмонална хипертензија ,годишен глобален настан за подигнување на свеста за пулмонална хипертензија (ПХ), тешка состојба која ги погодува белите дробови и срцето. На 5 мај повеќе од 80 организации ширум светот учествуваат во активности на за да ја подигнат свеста за оваа често погрешно дијагностицирана болест и да го слават животот на луѓето кои живеат со ПХ.
Во 2012 година, во Мадрид, Шпанија се одржа научен симпозиум и прва прослава на Светскиот ден на ПХ. Денот беше официјално одобрен од 22 здруженија на пациенти, 10 организации со ретки болести и осум научни здруженија. 5 мај првично беше избран за Светски ден на ПХ бидејќи тоа е годишнина од смртта на првото дете во Шпанија од пулмонална хипертензија како резултат на токсично масло од семе од репка пред повеќе од 30 години. Две години потоа на 5-ти мај 2014, за првпат во Македонија, во Гевгелија, се одбележа светскиот ден на пулмонална (белодробна) хипертензија. Глобалната кампања за подигање на свеста за постоењето на оваа ретка, смртоносна болест во цела Европа е под мотото Остани без ЗДИВ (GET Breathless for Pulmonary Hypertension). За еден пациент со белодробна хипертензија секој здив е предизвик.
Пулмоналната хипертензија е заболување на крвните садови на белите дробови кое се карактеризира со зголемување на притисокот во белодробните крвни садови, а може да биде предизвикана од најразлична етиологија. Идиопатската белодробна хипертензија (ИБХ) се јавува во процент од 7-10 пациенти на 1.000000 жители. Во Македонија има околу 25 дијагнози. Нејзиното лекување е поврзано со употреба на специфична терапија, а исходот најмногу зависи од правовремената дијагноза. Златен тест за дијагностицирањето на ПХ е десно срцевата катетеризација, каде се проценува белодробната реактивност на вазодилататорната терапија.
279374703_1172003890296378_6795785691135245914_n

Бесплатно преземање е дозволено со задолжително цитирање на медиумот и хиперлинк до оригиналната содржина на tvnova12.mk.

За сите споделени фотографии (графики), ТВ Нова 12 има екслузивно право да ги користи или истите се превземени од социјалните медиуми, запазувајки го кодексот на "фер употреба" - корисни за општеството (ТВ НОВА 12 има за цел да информира и известува и употребата на фотографиите (графиките) е исклучливо за некомерцијални цели).
Доколку, материјата на фотографиите (графиките): навредува, нарушува углед, или негативно отсликува состојба, или не е запазено авторското право Ве молиме контактирајте не, за да соодветно реагираме!

Напишете коментар

Вашата адреса за е-пошта нема да биде објавена. Задолжителните полиња се означени со *