ДАЛИ ГО ПЛАЌАМЕ ДАНОКОТ НА ДИГИТАЛИЗАЦИЈАТА ИЛИ НА НЕКВАЛИТЕТНИОТ КАДАР?

ПОВЕЌЕ ОД 50 ОТСТО ОД УЧЕНИЦИТЕ ОД ВТОРО И ТРЕТО ОДДЕЛЕНИЕ НЕ ЗНАЕЛЕ ДОБРО ДА ЧИТААТ!

Повеќе од половина од учениците во второ и во трето одделение не знаат да читаат. Проблем не е само читањето туку и сметањето на броеви. Само 45 проценти на оваа возраст имаат основни вештини за читање на 90 проценти од зборовите во расказот, да одговорат на три прашања за буквални значења и две за изведени значења. Дваесет и шест проценти од нив научиле да препознаваат броеви, да собираат и да дополнат шеми.

Уште позагрижувачка е состојбата со математичките проблеми. Само 26 проценти од децата во второ и во трето одделение имаат основни вештини со броеви – читање и разликување броеви, собирање, и препознавање и дополнување шеми. Шеесет и осум проценти успешно разликуваат броеви, но само 41 процент успеале во задачите за собирање, и препознавање и дополнување шеми.

Модулот се состои од пасус за читање и збир од прашања за разбирање поврзани со приказната, четири задачи засновани на универзални математички вештини кои се очекуваат на ниво на второ одделение.

Ова го покажува истражувањето на УНИЦЕФ и на Државниот завод за статистика спроведено во 2018-2019 г. При спроведената анкета, опфатени се ученици од 7 до 14 години, а резултатот покажува дека девојчињата предничат, бидејќи 70 проценти имаат основни вештини за читање за разлика од момчињата со 58 проценти. И натаму фактор на влијание е социјалната положба на семејствата.